【早霸王】女聽眾為咗型唔接受道歉 森美:愈氹只會令人愈忟

道歉真係一門好高深嘅學問,女聽眾Emily致電《早霸王》「你知道唔知道有人掛住你」話想同男友道歉,原因係自己發脾氣兼且要型,結果唔小心過咗火,搞到男友嬲咗,幾日都表現冷淡,就連情人節Emily送禮物去男友公司,對方都只係得句「多謝」。而係嬲豬前夕,Emily先啱啱同男友去完歐洲旅行,新年亦有去對方屋企拜年,之不過,就喺初四時,Emily同男友睇完戲之後,男友就急急腳走人,原係因要去朋友屋企玩。

「我係嬲佢睇完戲要各自走,佢過往都會送我返屋企,當晚有喺Whatsapp講咗啲唔好聽嘅說話,同埋我要佢講出我嬲啲咩,但佢就只係不停道歉同話自己唔啱。」其實當自己錯咩都唔知嘅時候,又點會講得出錯咩呢……


女聽眾Emily話男友識佢嘅時候已經知佢係惡底,試過撒嬌,但遭男友叫佢「唔好咁啦」,森美聽完之後話。「佢喜歡你豪爽,但唔係鍾意你串佢嘛。」


森美話大家都應該睇下佢本《每個人心裏都有把愛情尺》學習愛情。

嬲咗幾日,男友提議周未見面,Emily話自己由於仲嬲緊,所以都唔係好理會。「其實係想見,但要型嘛,結果到夜晚食飯先叫佢。」見面後,男友繼續係「唔好嬲」而Emily一於「繼續嬲」,結果成餐飯都食得非常唔愉快,之後二人亦減少聯絡,而男友更與友人討論到底「係責任定愛」。講到呢度,森美就認為男友愈氹,女友只會愈忟,最應該做就扮無嘢,並謂「如果佢係唔愛你,你嬲一分鐘,佢都可以同你拜拜,你唔需要自責,因為唔係你做左咩唔鍾意你,而係佢本身或者已經唔鍾意你。」Emily似乎仲未明當中道理,更指二人之前先去完旅行(雖然旅行期間都有鬧交同發脾氣),但森美同小儀都認為一齊旅行並唔代表什麼。


嬲人其實都好講技巧,如果好似Emily咁就好易出事。

森美指每個人喺愛情世界中都有把尺,並認為如果Emily如果真係愛男友多啲的話,就唔會有「要型」嘅舉動,而對方睇完戲之後急急腳去朋友屋企玩,都係因為「愛自己多啲」,講完之後,Emily似乎開咗竅,仲話自己從來都無諗過呢個「愛多啲」嘅問題。講到型,Emily透露本應16號同男友慶祝情人節,亦都訂咗檯食飯。「我發脾氣話要取消,仲比埋email佢睇cancel咗,但其實我轉頭有打返去re-book」


森美分析「愛自己多啲」定「愛對方多啲」講得好好。

電話接通男友阿豪,不過當佢知道女友呢個打去電台嘅舉動時,似乎有少少錯愕,仲話唔使咁公開。Emily亦都鼓起勇氣表示:「我其實好想同你食飯,我唔想我哋咁樣,想好似之前咁,你唔好唔聽我電話啦。」係森美助攻下,阿豪亦答應聽日一齊食飯,至於食完會唔會背脊骨落,就真係要睇下Emily造化啦。

Source : HK01.Entertainment

You May Also Like

Comment

Khu Đô Thị Hưng Hoà TNR Đồng Văn